Posté le: 16 Jan 2004

9:15 dans le Forum du site du <a href="http://www.farevanaa.pf"

target="_blank">Fare Vanaa Sujet du message: E

reo no te nuna'a
Auteur: TKNui

'Oia ia. E'ita vau e ho'i mai i muri no te vauvau atu i te parau o te reo e te nuna'a. Ua piahia te reira e te tahi mau taea'e o ta 'u e poihere nei o Duro, iaorana 'oe e tae noa atu i to 'oe 'utuafare, o Henri, ia vai 'oe i raro a'e i te tamaru hanahana o te Matameha'i Hope e ia mau te fa'atenira'a i te Ra'a i poiete i te ao, Maco e ta 'u hoa, 'oe tei turu mai ia fanau ai au i roto i te hau... rau atu mau ti'a e ti'a ihoa ia ha'apoupouhia, 'inaha e mau taea'e teie o tei here i te reo e o tei here ato'a i te nuna'a. Iaora. A parau i te parau ia 'itehia te mana'o e te huru o te ta'ata nuna'a, o te reira te tumu parau no teie tatarara'a.

Ua 'atutu i roto i te ve'a e te mau metia ha'apararera'a parau 'api: "ia papa'i e ia parau te ta'ata ma'ohi i to na parau". Parau mau roa, e'ere anei? Atira ra ia e ho ma, a rave i te penitara a peni ia fa'atarahia to tatou parau e ia ra'a te iho ma'ohi, a he'e i mua. E aha atu ra ia te parau no te mau mana'o, no te mau mana'o i tarava-a'e-na-hia i ni'a i te mau 'api. Tei hea teie mau parau i taponi-noa-hia na, e aha to roto, e ti'a anei ia 'auhunehia te reira aore ra ua mo'e roa i raro i te moe. A tatari mai, ia matara e ia 'itehia te faufa'a e vai ra i roto i taua mau parau mo'emo'e, tei roto te parau no te mana'o o te feia tahito, te mana'o ia o te mau tupuna, te mana'o e vauvau mai ra i te huru o te nuna'a o te reira tau, te huru ato'a ia i 'ahuhia tatou.

Parau tupuna, puta tupuna, tupuna ma tei hea 'outou?

Ia hi'o pa'ato'a tatou i teie mau puta o ta 'u e pi'i nei, e mau puta ana'e o te fa'ata'a mai nei i te mana'o o te feia i ora na i te tau no te taera'a mai o te 'evaneria. Na muari'i noa atu aore ra na muri mai. Ia mau ho'e o teie nei mau puta i roto i to 'outou rima, e mai te mea noa atu ua 'ite 'outou i te tai'o i te reo, e mai te peu ho'i e e ta'ata 'a'au ma'ohi papu to 'outou, ua re ia tatou. 'Inaha ho'i, tei roto te parau no te ta'ahurira'a o te ao ma'ohi no muta'a iho ra e te tau 'api i ta'ita'ihia mai e te mau manu no te atea mai. Ua fana'o anei te tahi o tatou i teie huru puta?

Tei roto te parau mau i ni'a i to tatou huru, te huru o to tatou mau tupuna, te huru o te nuna'a o te reira tau. Ia maramarama tatou hou a tai'o ai, ia 'ore e hahi 'e roa te aura'a e fa mai i roto i te upo'o, ti'aturi mai. 'Ei 'a'au maohi e ti'a ai. E'ere teie parau no te ha'afaufa'a 'ore ia vetahi 'e. E ti'a'orora'a ra i te u'i maramarama o teie fenua ia hi'o, ia tai'o e ia fa'ahiti mai o ia i te mea o ta na e 'ite ra i roto i teie mau puta. Ia fa'ahoho'a mai o ia i te mau hoho'a ato'a e hiti mai i roto i to na manava e i roto i to na 'a'au. Ia 'itehia te hoho'a mata o te feia e parauhia nei to ratou parau i roto i teie mau puta. E'ita teie mau parau e roa'a i te ta'ata no rapae. Mea 'e te maramarama o te papa'a, mea 'e te maramarama no roto ia tatou. Ua hi'ihia tatou i roto i te here e te fa'atura i te metua e i te Atua. Na te reira e arata'i i to tatou maramarama no te fafa i te mau faufa'a e vai ra i roto i teie mau puta.

E aha te ta'a-'e-ra'a o te marama o te papa'a i to tatou iho. Vahi rahi teie. Tei roto te papa'a i te fa'ata'ara'a i te pa'a, tei roto tatou i te fa'ata'ara'a i te ma'a. 'Eiaha e 'ino'ino mai, 'eiaha ato'a e 'ata noa, a hape atu ai te parau. E parau pa'ari teie. Ia parauhia tei roto te maramarama o te papa'a i te pa'a, teie to na aura'a. Ia feruri ratou i te tahi tumu parau, 'oi'oi roa ratou i te hi'o i te pa'a, 'oia ho'i te rapaera'a o te tumu, te rapaera'a o te ma'a. A hi'o na mea nahea ratou ia tuatapapa i te tahi tumu parau. E tai'o ratou i te parau e feruri ratou, ia oti i reira ratou e rave ai i te mau tite'a mata huru rau, 'oia ho'i te mau parau maramarama ato'a i pia-a'e-na-hia e to ratou mau ta'ata maramarama. E aha te faufa'a e noa'a mai. Te vai ra, parau mau roa ia. E 'itehia te mau tai'o mahana, te huru o te mau faito, te mau piirou e rave rahi e vai nei i roto i te tumu parau e tuatapapahia ra. 'Ahiri na ra, e aha atu ai. Tei hea maoti te ma'a.

Na tatou te reira. Ia hi'o tuatapapa tatou i te parau. E tai'o tatou, e 'amu tatou i te parau ia topa 'oia i roto i te vaira'a i reira o ia e hotu ai no te fa'a'ite mai i te au, te 'ino, te navenave, te 'oa'oa e aha ana'e atu a mau tupura'a i ni'a ia tatou. O te reira ia te parau no te ma'a. Ia monamona o ia, e 'ata'ata tatou, ia 'ava'ava o ia to'iro'iro ato'a tatou, ia navenave o ia ua fa'ahiahia ia tatou. I muri iho tatou e 'afa'i ai i te reira mau tupura'a i mua i te aro o te ta'ata no te vauvau atu i te faufa'a i noa'a mai e no te 'opere atu i roto ia tatou ia tupu atu te reira i roto i te ta'ato'ara'a. O te ora ia teie e 'operehia ra. E'ere anei?

A rave tatou i te au i to tatou huru na roto i te tuatapapara'a i to tatou parau. Ia hi'o tutonu tatou i te mau parau tupuna, e ta'i, e 'oa'oa, e parau mau te hiti mai, e hoho'a te hiti mai i roto i to tatou manava. O te hoho'a ia o te mau ta'ata o tera ra 'anatau, o te hoho'a ia o te mau tupuna, o to tatou iho ia huru.

'Ei hi'ora'a: Ha'afaufa'a ia tatou i te mau parau i tatarahia mai mai tau mai a e te feia maramarama 'ihi no to ratou 'ite papa'a, tei tuatapapa i te parau no hea mai tatou. Ua tui to tatou ro'o ia ratou, aita ra ratou i ha'afaufa'a roa atu i te ta'ata maohi. Ua ha'afaufa'a ra i ta ratou mau mauiha'a tuatapapara'a. O te pa'a noa ia te reira. 'Inaha ra te ma'a. Na tatou te reira e 'auhune, ua pa'ari tatou i roto i te maramarama papa'a, e ta'a ia tatou i ta ratou huru arata'ira'a, i ta ratou huru fa'ata'ara'a parau maramarama. Teie nei ra, ua tae tatou i te tau e ti'a ia tatou i te 'ahu-fa'aho'i-fa'ahou mai i to tatou huru, 'oia ho'i te maramarama o te varua. Ua 'ite tatou tei hea te ha'apura'a o te varua. E'ere tei roto i te mafatu, tei roto i te 'a'au. E'ere ho'i te mafatu te mauiui ia pohe te ho'e taea'e, o te 'a'au ra, e'ere te mafatu te navenave ra ia 'apiti te tane e te vahine, o te 'a'au ra, e'ere te mafatu te 'oa'oa ra ia farerei te taea'e i te taea'e tau maorora'a te tau, o te 'a'au ra.

E ho ma, 'eiaha e tapitapi i ta tatou iho, i to tatou iho, te vai noa ra o ia i te moemoeara'a ia ti'ihia mai o ia no te tu'u mai i ni'a i te mahana, i te vahi ateatea. Te maramarama, ua tu'uhia i raro i te ruru ra'au, 'are'a ra te fa'ahiahia o te upo'o ua tu'uhia i ni'a i te 'amura'a ma'a.

Hahu ana'e i to tatou mau upo'o, ia vera te mahana i ni'a e ia tau mai te tamaru o te varua i ni'a i te upo'ora'a.
Te u'i hou, te feia 'api o teie fenua, te vai noa ra te 'ohipa e 'ore e mara'a i te feia no rapae mai, e 'ore e tano na te feia i ratere mai e to ratou 'a'au papa'a e rave. A hi'o tutonu i te hohonura'a o teie mau parau, a hamama te tari'a ia fa'aro'o 'outou i te pi'ira'a no roto mai i te nuna'a. A fa'ahoho'a mai i te hiro'a o te mau tupuna. Te faufa'a tei roto ia ratou, 'inaha te 'otare nei tatou ma te feruri tu'utu'u 'ore tei hea tatou. Tei 'o nei tatou, te ti'a nei tatou i ni'a i te papa o teie fenua. E tino to tatou, e fenua to tatou, e reo to tatou. A rave i te 'ohipa, a tamaru te tino, a parau te vaha i teie mahana. To 'oe reo, e'ere no te fa'ateni ia 'oe i mua i te ao. To 'oe reo no te fa'atauaroha nuna'a ia.

Mauruuru i te tai'ora'a mai !