Texte publié sur le Forum du Fare Vanaa. Posté le: 17 Avr 2003 12:14 Sujet du message: E reo no papa raua mama
Auteur: TKNui

Aita vau i pa'ari maoro i piha'i iho i to 'u na metua tupuna,

Te mea o ta 'u e ha'amana'o nei maoti ra o to raua huru, aita e rahi te parauparau. I ni'a noa i te tu'e mata, te haere e te 'opa'opa o to raua tino, ua ta'a ia 'u e fifi teie aore ra e hina'aro teie no na ru'au nei. 'Are'a ra to raua reo aita roa te reira i ha'amaoro mai i roto i to 'u tari'a, aita ho'i au e hamana'o fa'ahou, ua mate raua e mea 'api to 'u matahiti i te revara'a atu.
Ia ti'a atu ra tera ru'au, te pa'a'inara'a ihoa te reo o to 'u mama i te paraura'a: "a ti'i i te parahira'a o papa 'u a amo atu i rapae mai ia parahi o ia i raro a'e i te tumu tipanie". 'Oi'oi roa vau i te 'afa'ira'a atu i to na parahira'a i te vahi matarohia. Ti'a noa vau i piha'i iho ia na ma'a taime iti noa a'e ia hina'aro noa atu o ia e ani mai i te tahi 'ohipa ia 'u ia rave au.

Ia tape ri'i mai te mahana ua tae ato'a te taime a ho'i mai ai to 'u papa na te 'ohipa. E 'ohipa teimaha ta na, raverave noa te rima 'aita te tino e fa'aeara'a e hope noa atu te hana. Ia tae mai ra o ia, i reira ia to te fare e 'imi ai i te rave'a no te tamru i to na rohirohi.

E'ere ato'a to na vaha i te mea parauparau, aita o ia e fa'ahiti noa i te parau mai te mea aita e tumu papu. Ia hamama noa atu o ia i to na vaha, 'eiaha ia tapiti te uira'a, e 'aueue te fenua. Ia hau o ia i to na rohirohi i reira te mau tamari'i e putuputu ai 'ati roa a'e o ia. I taua taime o ia e fa'ati'a mai ai i te mea i orahia mai e ana i te roara'a o te mahana, i reira ato'a matou e 'ata'ata ai e parauparau ai. Fa'ati'a mai te tahi i ta na mau 'ohipa i rave i te ha'api'ira'a, fa'ati'a mai te tahi i ta na patara'a poro: 'ahehe atu ai ho'i matou i te 'ata, fa'a'ite atu vau i ta 'u puta e tai'o ra... Ua tui te po, e maramarama mori ramepa no te turama i teie rahira'a ta'ata.

Aita matou e parauparau noa i te mau taime ato'a, e parauparau te mau tamari'i ratou ratou iho, pinepine 'ore ra te metua e parauparau mai 'inaha ra ia titau mai ratou i te rima rave no te tamara'a i te fare e tae noa atu i te 'aua. Ia parau mai te metua, o mama ia te parau mai i te hina'aro o raua piti. Te vai ra te taime e a'ohia matou no te mea ua rave matou i te tahi 'ohipa tano 'ore, aita teie mau parau e fa'ananeahia atu i te mau parau i matarohia e matou i te mau mahana ato'a. Teie nei ra no te mea ua hape matou, ha'apapuhia te parau no te ha'ama, no te fa'atura 'ore, no te te'ote'o o te tamari'i nei... mai te mea aita te parau e nava'i tei ni'a ia te faito i te tua.

Ia fa'aauhia i te orara'a o teie tau, mea hau a'e te fa'atura o te tamari'i i taua tau ra i to ratou metua, noa atu te ha'iha'i o te maramarama ha'api'ira'a o taua mau ru'au ra, ua papu ra ratou i ni'a i to ratou ti'ara'a metua. Aita te tamari'i e hurita'ere i te fa'aterera'a a te metua tane.

Te mea 'itehia i teie mahana, ua rahi roa te 'arepurepura'a i roto i te ferurira'a o te mau metua. Te tapapa ato'a nei ratou i te ti'ara'a metua mai te 'itehia ra i roto i te 'afata teata, mai te 'itehia ra i te mau fenua 'e'e.
Parau mau ua nu'u te mau mea ato'a i mua, ua tere te tau, aita e ti'a ia hi'o noa i muri, teie nei ra ho'i e au ra pa'i te hurira'a atu i mua, ua huru-vi-roa-hia te 'api o te orara'a ma'ohi tumu, ua papa'a-roa-hia tatou. E tupu ihoa te 'atara'a a te papa'a no te mea te pere nei tatou i te tahi perera'a matauhia e ratou, te aura'a ra e vai noa ihoa ia tatou i muri. E mai te mea ra ho'i e ta'ata maramarama tatou e ia re tatou i teie perera'a, tapa'o ihoa ia e ua papa'a-roa-hia tatou, te aura'a ra ua pau ia tatou i ni'a i to tatou iho huru. Aita e reo fa'ahou, aita e fenua fa'ahou, aita e ma'ohi fa'ahou.

Ha'ama i te rahi to tatou i to tatou huru, e aha maoti te tumu, tei roto roa i to tatou roro teie ma'i i te vaira'a, e ma'i no te ha'ama, e ma'i no te hi'ora'a ve'uve'u, e ma'i no te maramarama 'ore, e ma'i no te moni 'ore, e ma'i no te fa'ahiahiara'a 'ore, e ma'i ana'e ho'i te reira no te ta'ata fa'atitihia.

Ua muhu a'e na te vaha o to 'u na metua, no te mea 'aita e faufa'a ta te parau mai te mea 'aita e tumu parau papu. I te ta'ato'ara'a o te taime, hi'o noa te mata a rave noa ai te rima. Tei reira te ha'api'ira'a mau.

Mauruuru te tai'ora'a mai!