Texte publié sur le Forum du Fare Vanaa. Posté le: 11 Avr 2003 8:24 Sujet du message: E reo no papa 'u e reo no mama 'u
Auteur: TKNui

Mea mauiui roa ia hi'o tatou i te ta'a-'e-ra'a ta tatou mau tamari'i ia tatou iho. Ha'amana'o na taua i te tau a pa'a'ina mai ai te reo o papa 'u ma i te tuhira'a mai "a haere na e para'u i te pehu, a 'ohi te rau'ere, a tanina atu i raro a'e i te tumu 'uru". Amuamu noa atu ra ho'i taua, 'ouhumu noa atu ra ma te 'ore ra e fa'a'ite, 'a'ua nei a tano ai i te po'ara.

Aita taua e moemoea ra i te tano po'ara, e'ere taua i te ma'ama'a. Te hi'o atea nei au i muri ia 'u teie na ru'au tei fanau mai i to 'u metua, o vau nei nei ho'i teie e ti'a nei i teie taime, i mua ia 'u ta 'u tamari'i to'opiti e 'ata'ata noa ra e te parauparau farani ra. Te huru 'e nei au, aita vau i tu'ati teie hui tupuna i ta 'u mau tamari'i. Aita teie na tamari'i e ha'ape'ape'a ra i teie taime, ua 'ite ra vau e utu'a teie na 'u, ia 'ore au e amo i te reira e tatarahapa vau i muri. Te 'oto ra te 'a'au no to 'u tari'a e tehuhia nei i te fa'aro'ora'a i to te tahi reo, no to 'u arero tei 'afaro i te reo tipe'e e te tafifi pinepine ra i te paraura'a i to 'u iho reo. Hurita'erera'a papu teie.
Ua ti'a mai te tahi nau taea'e no te fa'ahiti i te faufa'a no te reo, te aura'a e vai nei i roto i te reo e te fa'anahora'a o te ao, te reo 'ei faufa'a mo'a no roto mai i te Atua, te reo nati fa'aora i te nuna'a, te reo 'ei ma'a i hi'i na e rave rahi mau u'i na mua atu ia tatou...
Tei hea atu ra tatou i teie mahana? Ua tere te tau e ua 'auhune te 'auhune, e aha ra te ma'a i tu'uhia nei i ni'a i te 'iri tama'ara'a a te ma'ohi?

Ua ti'a e ua rohi mai teie pu farevana'a, ua mau te ha'api'ira'a reo ma'ohi i roto i te mau ha'api'ira'a, te horo nei to tatou u'i 'api e haru i te parau tu'ite reo ma'ohi, te ha'api'i 'u'anahia nei ta tatou mau peu i roto i te mau fare ha'api'ira'a, te 'orero nei te feia porotita i roto i te fare 'apo'ora'a rahi, te tatau nei te papa'a i to na 'iri..? Aita e hope ia 'u ia fa'ahiti i te vahi i fa'aohia te reo aore ra te peu ma'ohi i roto..? E aha pa'i au e ta'aminomino noa ai mai te tahi ta'ata e 'ore e maha nei te po'ia?
E au ia 'u teie 'ohipa mai te tahi ra'au fa'ata'oto, tahoro noa ra tatou i te mana'o te vai noa ra tatou i ni'a i to tatou ti'ara'a. Ia hi'o papu atu ra ra tatou i roto i te hohonura'a o to tatou 'a'au e i raro a'e i te tu'e mata o ta tatou tamari'i, e aha te mea ta tatou e 'ite ra aore ra e 'ore e 'ite fa'ahou ra. Ua marere to tatou varua, ua tau mai te tahi varua 'e roa.

Mauruuru te tai'ora'a mai!